WACHUNGAJI WATAKA KIGOGO EAGT ACHUNGUZWE

NA WAANDISHI WETU. Baadhi ya Wachungaji waKanisa la The Evangelistic Assemblies of God Tanzania(EAGT), wameutaka uongozi wa juu wa kanisa hilo kumchunguza na kumchukulia hatua ikibidi, mmoja wa Wadhamini wa kanisa hilo, Mchungaji Dkt. Kenneth Kasunga kutokana na kile ambacho wamesema “amekosa uaminifu” kama anavyotakiwa na Katiba ya EAGT.Katika taarifa yao waliyoituma kwa gazeti la MWANZO wiki hii,wachungaji hao ambao wameomba majina yao yasiandikwe, wameeleza kuwa kuna mambo mawili ambayo kanisa linapaswa kuyatumia ili kumchunguza Dkt. Kasunga.Jambo la kwanza, wachungaji hao wanadai, Dkt.Kasunga ambaye huchunga Kanisa la EAGT Kyela mjini mkoani Mbeya, ameharibu imani ya umma kwa EAGT kimafundisho kutokana na kutetea mahubiri yasiyo sahihi kulingana na Kurugenzi ya TEBE ambayo husimamia mafundisho na uinjilisti katika kanisa hilo. Jambo la pili, wachungaji hao wanadai, mchungaji huyo alishindwa kusimama katika misingi ya kiuongozi na kusababisha waliokuwa viongozi wa EAGT Kanda ya Nyanda za Juu Kusini Kati kujiuzulu. Wanadai mchungaji huyo alifanya kitendo ambacho baadaye kilisababisha madhara hata kwa viongozi wakuu wa EAGT.Wakifafanua katika taarifa yao hiyo, Wachungaji hao wanadai kuwa kitendo cha Mchungaji Dkt. Kasunga kumtetea, kumlinda na kuchukua mafungu ya kumi kutoka kwa mwanamke anayehubiri ‘injili iliyojaa simulizi za uchawi’ ambayo imepingwa na Kurugenzi ya TEBE pamoja na walimu wa Biblia, inatia shaka uaminifu wake. Wiki iliyopita, Dkt. Kasunga aliliambia gazeti hili katika mahojiano kuwa, yeye hana shida na anaikubali injili ya simulizi za uchawi inayohubiriwa na mwanamke anayejulikana kwa jina la Josephine Thobias.MWANZO lilimtafuta Dkt. Kasunga baada ya Josephine kudai kuwa amehamishia mafungu yake kwa Mdhamini huyo wa EAGT baada ya kujiondoa kwa aliyekuwa Askofu wa EAGT Kanda ya Mashariki, Mchungaji Dkt.Nicodemus Nyenye. Dkt. Nyenye huchungaji kanisa la EAGT Patmo, Kigamboni jijini Dar es Salaam. Mwanamke huyo alisema Dkt. Kasunga ndiye amekuwa mlezi wake. Mazungumzo baina ya MWANZO na Dkt. Kasunga ambayo yalikabiliwa na kizuizi baada ya awali kugoma kuzungumza akidai kuwa gazeti limewachafua viongozi wa EAGT kwa kuchapisha habari bila kuwauliza, akiwemo yeye.